संस्थापन पक्षले गरेका निर्णय नमान्ने देउवा समूहको निर्णय, आफ्नै प्रक्रियाबाट महाधिवेशन अघि बढाउने
- भदौ २९, २०८३
- 0
काठमाडौं । नेपाली कांग्रेसभित्र विशेष महाधिवेशनको वैधानिकतालाई लिएर देखिएको विवाद थप चर्किएको छ । शेरबहादुर देउवा समूहले गगन थापा नेतृत्वको संस्थापन पक्षले गरेका निर्णय नमान्ने घोषणा गर्दै आफ्नै प्रक्रियाबाट महाधिवेशन अघि बढाउने निर्णय गरेको छ ।
सोमबार बिहान देउवा निवास चुनदेवीमा बसेको समूहको बैठकले आगामी मंसिरमा १५औँ महाधिवेशन गर्ने गरी असोज १५ गतेदेखि पार्टीका अधिवेशनहरू सञ्चालन गर्ने निर्णय गरेको हो ।
संस्थापन पक्षले भने आइतबारको कार्यसम्पादन समिति बैठकबाट १४औँ महाधिवेशनबाट निर्वाचित सबै केन्द्रीय सदस्यलाई सोही हैसियतमा १५औँ महाधिवेशनमा सहभागी गराउने निर्णय गरेको थियो ।
तर, देउवा समूहले पुसमा भएको विशेष महाधिवेशनलाई नै अवैधानिक भन्दै त्यसबाट बनेको समितिले गरेका निर्णय स्वीकार नगर्ने निष्कर्ष निकालेको छ ।
बैठकपछि नेता दीपक खड्काले राजनीतिक छलफल र सहमतिबिना विशेष महाधिवेशनबाट आएको कार्यसम्पादन समितिले गरेका निर्णय आफूहरूले नमान्ने बताए ।
उनका अनुसार समूहले १४औँ महाधिवेशनबाट आएको समितिले तय गरेको कार्यतालिकाअनुसार नै अधिवेशन प्रक्रिया अघि बढाउने निर्णय गरेको छ । संस्थापन पक्षले एकपक्षीय रूपमा तय गरेको असोज १६ देखि १९ गतेसम्मको महाधिवेशनमा सहभागी नहुने पनि समूहको निष्कर्ष छ ।
महाधिवेशनको तयारीका लागि निर्वाचन समिति, अनुशासन समिति र क्रियाशील सदस्यता व्यवस्थापन समिति गठन तथा त्यसलाई पूर्णता दिने निर्णयसमेत बैठकले गरेको छ । समूहले आइतबार नै निर्वाचन समितिको संयोजकमा यगराज पोखरेललाई नियुक्त गरिसकेको छ ।
यसैबीच, पार्टीको आधिकारिकतासम्बन्धी सर्वोच्च अदालतको फैसलामाथि पुनरवलोकनको अनुमति प्राप्त भइसकेकाले त्यसको अन्तिम निर्णय नआएसम्म त्यसलाई समेत ध्यानमा राखेर गतिविधि अघि बढाउने देउवा समूहले जनाएको छ ।
गत पुसमा तत्कालीन केन्द्रीय समितिको असहमतिबीच महामन्त्रीद्वय गगन थापा र विश्वप्रकाश शर्माको अगुवाइमा विशेष महाधिवेशन भएपछि कांग्रेसभित्र विवाद गहिरिएको हो । देउवा र डा. शेखर कोइराला समूहले उक्त विशेष महाधिवेशनलाई अहिलेसम्म स्वीकार गरेका छैनन् ।
विशेष महाधिवेशनपछि बनेको संस्थापन पक्ष र १४औँ महाधिवेशनबाट आएको पुरानो संरचनाबीचको विवाद समाधान गर्न विभिन्न चरणमा छलफल भए पनि सहमति जुट्न सकेको छैन ।
देउवा र शेखर समूहले १५औँ महाधिवेशनका लागि पुस मसान्तसम्म नवीकरण भएका क्रियाशील सदस्यलाई मान्यता दिनुपर्ने तथा १४औँ महाधिवेशनबाट निर्वाचित सबै केन्द्रीय सदस्यलाई नयाँ संरचनामा समावेश गर्नुपर्ने माग राख्दै आएका थिए ।
संस्थापन पक्षले केन्द्रीय सदस्यसम्बन्धी माग सम्बोधन गरे पनि विशेष महाधिवेशनको वैधानिकतामै प्रश्न उठाउँदै देउवा समूहले आफ्नो छुट्टै कार्यतालिका अघि सारेको हो ।
आफ्ना पछिल्ला निर्णय सार्वजनिक गर्न देउवा समूहले सोमबार दिउँसो ४ बजे चुनदेवीस्थित सम्पर्क कार्यालयमा पत्रकार सम्मेलन गर्ने जनाएको छ।
0 प्रतिक्रिया
संखुवासभा समाज हङकङद्वारा प्रधानमन्त्री राहत कोषमा ८ लाख सहयोग
संखुवासभा समाज हङकङले प्रधानमन्त्री राहत कोषमा आठ लाख रुपैयाँ सहयोग गरेको छ।. बाढीपहिरो पीडितको उद्धार तथा पुनःस्थापनाका लागि यो आर्थिक सहयोग गरिएको हो।
मुग्लिन-नारायणगढ सडक अनिश्चितकालका लागि बन्द
काठमाडौं । जिल्ला प्रशासन कार्यालय चितवनले लगातारको वर्षा र पहिरोका कारण नारायणगढ–मुग्लिन सडक बन्द गरिएको जनाएको छ । प्रशासनले आज […]
पहिरोका कारण बीपी राजमार्ग बन्द
रामेछाप । रातभर परेको अविरल वर्षाका कारण पहिरो खसेपछि बीपी राजमार्ग बन्द भएको छ । वर्षाका कारण सडकमा लेदो तथा […]
