युरो किड्स तथा युरो स्कुल इमाडोलको तेस्रो वार्षिकोत्सव तथा दीक्षान्त समारोह भव्य रुपमा सम्पन्न
- रोजगारमञ्च
- चैत्र २९, २०८२
- 0
ललितपुरको इमाडोलस्थित युरो किड्स तथा युरो स्कुल इमाडोलले आफ्नो तेस्रो वार्षिकोत्सव तथा दीक्षान्त समारोह शनिबार भव्य, सुसज्जित र अत्यन्त भावनात्मक वातावरणमा सम्पन्न गरेको छ। कार्यक्रममा अभिभावक, हजुरबा–हजुरआमा तथा विशिष्ट अतिथिहरूको उल्लेखनीय उपस्थितिले उत्साह थपेको थियो।
कार्यक्रममा संस्थापक अध्यक्ष नवराज काफ्ले को सभापतित्व रहेको थियो भने प्रमुख अतिथिका रूपमा चर्चित कलाकार किरन के.सी राता मकै को गरिमामय उपस्थिति रहेको थियो। त्यसैगरी, प्रबन्ध निर्देशक सम्झना गिरी, निर्देशक तथा वरिष्ठ प्रिन्सिपल खेम नाथ तिम्सिना, युरो किड्स इन्टरनेश्नल स्कुल इमाडोलकी संस्थापक प्रिन्सिपल निशा थापा, विद्यालयकी निर्देशक सपना पोखरेल लगायत अन्य अतिथिहरूको उपस्थितिले कार्यक्रमलाई अझ गरिमामय बनाएको थियो।
कार्यक्रमका सभापति नवराज काफ्लेले आफ्नो मन्तव्यमा विद्यालयको फरक पहिचानबारे उल्लेख गर्दै भन्नुभयो, “हामीले बालबालिकालाई केवल पढाउने होइन, उनीहरूलाई बुझ्ने र उनीहरूको भित्री क्षमता बाहिर ल्याउने काम गरिरहेका छौं। प्रत्येक बालबालिका फरक हुन्छ, र त्यही फरकपनलाई सम्मान गर्दै उनीहरूलाई अघि बढाउने वातावरण सिर्जना गर्नु नै हाम्रो उद्देश्य हो। आज यहाँ देखिएको आत्मविश्वास र प्रस्तुति त्यसैको प्रतिफल हो।”
औपचारिक कार्यक्रमसँगै विद्यार्थीहरूको प्रस्तुतिले सभाहललाई पूर्ण रूपमा जीवन्त बनाएको थियो। नृत्य, गायन, योग, कराँते लगायतका विविध विधामा साना-साना विद्यार्थीहरूले प्रस्तुत गरेका कार्यक्रम केवल मनोरञ्जनमा सीमित थिएनन्, ती अनुशासन, अभ्यास र आत्मविश्वासको उत्कृष्ट उदाहरण थिए। उनीहरूको हाउभाउ, तालमेल, आत्मविश्वासले उपस्थित सबैलाई चकित बनाएको थियो।
कार्यक्रमभर अभिभावकहरूको उत्साह र भावनात्मक संलग्नता स्पष्ट देखिन्थ्यो। आफ्ना सन्तान स्टेजमा उभिएर आत्मविश्वासका साथ प्रस्तुति दिँदा अभिभावकहरू खुशीले प्रफुल्लित मात्र होइन, कतिपय क्षणमा भावुक समेत बनेका देखिन्थे। क्यामेरामा ती क्षण कैद गर्ने, ताली बजाउँदै हौसला दिने र गर्वका साथ मुस्कुराउने अभिभावकहरूको उपस्थिति कार्यक्रमको अर्को महत्वपूर्ण पक्ष बनेको थियो।
यसैबीच, प्रमुख अतिथि किरन के.सीले मन्तव्य राख्दै भन्नुभयो, “आज मैले यहाँ प्रतिभा मात्र होइन, भविष्य देखेँ। यस्तो उमेरमै यति आत्मविश्वासका साथ प्रस्तुत हुन सक्नु भनेको उत्कृष्ट शिक्षा र वातावरणको परिणाम हो। यस्ता विद्यालयहरूले देशको भविष्य निर्माण गरिरहेका छन्।”
विद्यालयका निर्देशक तथा वरिष्ठ प्रिन्सिपल खेमनाथ तिम्सिनाले विद्यालयको समग्र विकास र विस्तारबारे प्रकाश पार्दै भन्नुभयो, “यो विद्यालयले छोटो समयमै आफूलाई एक विश्वासिलो शैक्षिक संस्थाको रूपमा स्थापित गरेको छ। हामीले बालबालिकाको समग्र विकास-शैक्षिक, व्यवहारिक र सृजनात्मक पक्षलाई सन्तुलित रूपमा अघि बढाउँदै आएका छौं। आगामी दिनमा अझ गुणस्तरीय शिक्षा विस्तार गर्दै देश तथा विदेशका विभिन्न स्थानमा यसको पहुँच विस्तार गर्ने हाम्रो लक्ष्य रहेको छ।”
कार्यक्रमको सबैभन्दा महत्वपूर्ण र भावनात्मक अंशका रूपमा दीक्षान्त समारोह सम्पन्न भयो। साना नानीहरूलाई औपचारिक रूपमा अर्को शैक्षिक चरणतर्फ अघि बढाउने यो क्षणले सम्पूर्ण वातावरणलाई गहिरो भावनामा डुबाएको थियो। दीक्षित विद्यार्थीहरू कन्भोकेसन गाउन र टोपीमा सजिएका थिए, जसले उनीहरूको यात्राको विशेषता झल्काउँथ्यो। एकातिर खुसी-नयाँ यात्राको सुरुवातको, अर्कोतर्फ भावुकता-प्रिय शिक्षक र साथीसँग बिताएका दिनहरू छुट्टिने।
यसै क्रममा, अभिभावकहरूको आँखामा खुशीसँगै गर्व र भावुकताको मिश्रण स्पष्ट देखिन्थ्यो। उनीहरू आफ्ना सन्तानको उपलब्धिलाई नजिकबाट महसुस गर्दै थिए। दीक्षान्त केवल प्रमाणपत्र ग्रहण गर्ने कार्यक्रम नभई, बालबालिकाको प्रारम्भिक यात्राको सफल समापन र उज्ज्वल भविष्यतर्फको नयाँ ढोका खुल्ने प्रतीकका रूपमा प्रस्तुत भयो।
यही भावनात्मक क्षणमा युरो किड्स इन्टरनेश्नल स्कुल इमाडोलकी संस्थापक प्रिन्सिपल निशा थापाले आफ्ना अनुभूति व्यक्त गर्दै भन्नुभयो, “यी नानीहरू पहिलो दिन डराउँदै हाम्रो कक्षामा आएका थिए, आज उनीहरू आत्मविश्वासका साथ संसारतर्फ अघि बढिरहेका छन्। उनीहरूको हरेक सानो पाइला हाम्रो लागि ठूलो उपलब्धि हो। उनीहरूलाई यहाँबाट विदा गर्दा मन निकै भावुक हुन्छ, तर उनीहरूको उज्ज्वल भविष्यप्रति उत्तिकै आशावादी पनि छौं।”
कार्यक्रमको अन्त्यतिर महिला शिक्षकहरूको आकर्षक नृत्य प्रस्तुति प्रस्तुत गरिएको थियो, जसले सम्पूर्ण माहोललाई उत्साहपूर्ण बनाउँदै कार्यक्रममा थप रौनकता ल्यायो।
समग्रमा, युरो किड्स तथा युरो स्कुल इमाडोलले फेरि एकपटक प्रमाणित गरेको छ कि शिक्षा केवल पाठ्यपुस्तकमा सीमित हुँदैन-यो आत्मविश्वास निर्माण गर्ने, प्रतिभा उजागर गर्ने र जीवनलाई सही दिशा दिने एउटा सशक्त आधार हो। यहाँबाट दीक्षित भएका प्रत्येक बालबालिका केवल विद्यार्थी होइनन्, भविष्यका सक्षम, सिर्जनशील र आत्मविश्वासी नागरिकका रूपमा उदाउँदैछन्र- यही नै यस विद्यालयको सबैभन्दा ठूलो सफलता हो।
0 प्रतिक्रिया
संखुवासभा समाज हङकङद्वारा प्रधानमन्त्री राहत कोषमा ८ लाख सहयोग
संखुवासभा समाज हङकङले प्रधानमन्त्री राहत कोषमा आठ लाख रुपैयाँ सहयोग गरेको छ।. बाढीपहिरो पीडितको उद्धार तथा पुनःस्थापनाका लागि यो आर्थिक सहयोग गरिएको हो।
मुग्लिन-नारायणगढ सडक अनिश्चितकालका लागि बन्द
काठमाडौं । जिल्ला प्रशासन कार्यालय चितवनले लगातारको वर्षा र पहिरोका कारण नारायणगढ–मुग्लिन सडक बन्द गरिएको जनाएको छ । प्रशासनले आज […]
पहिरोका कारण बीपी राजमार्ग बन्द
रामेछाप । रातभर परेको अविरल वर्षाका कारण पहिरो खसेपछि बीपी राजमार्ग बन्द भएको छ । वर्षाका कारण सडकमा लेदो तथा […]
