ज्ञान र संस्कारको संगम : युरो किड्स, गोठाटारमा सरस्वती पूजा भव्य रूपमा सम्पन्न

माघ १०, २०८२
0

ज्ञान, बुद्धि र विद्याकी देवी श्री सरस्वतीको आराधनाका लागि युरो किड्स, गोठाटारले शुक्रबार विशेष कार्यक्रमका साथ सरस्वती पूजा भव्य रूपमा सम्पन्न गरेको छ। सरस्वती पूजाको अवसरमा विद्यालय परिसरलाई कलात्मक र बालमैत्री ढंगले आकर्षक रूपमा सजाइएको थियो, जसले सम्पूर्ण वातावरण भक्तिमय, शान्त र उत्सवमय बनेको थियो।

कार्यक्रममा विद्यालयका नानीहरू, अभिभावकहरू तथा स्थानीय समुदायका व्यक्तिहरूको उल्लेखनीय उपस्थिति रहेको थियो। अभिभावकहरू आफ्ना साना नानीहरूलाई साथमा लिएर विद्यालयमा उपस्थित भई देवी सरस्वतीको पूजा–आराधना गर्दै ज्ञान, सद्बुद्धि र उज्ज्वल भविष्यको कामना गरेका थिए।

यसै अवसरमा विद्यालयद्वारा अक्षरारम्भ कार्यक्रम पनि आयोजना गरिएको थियो। अक्षरारम्भ कार्यक्रममा धेरै नयाँ बालबालिकाले औपचारिक रूपमा अक्षर लेखनको शुभारम्भ गरेका थिए। पहिलो पटक कलम समाएर अक्षर कोर्ने नानीहरूको उत्साह र अभिभावकहरूको भावुक अनुहारले कार्यक्रमलाई विशेष अर्थपूर्ण बनाएको थियो। शिक्षाको पहिलो पाइला संस्कार र संस्कृतिसँग जोडेर अघि बढाउनु नै युरो किड्सको मुख्य उद्देश्य रहेको विद्यालय प्रशासनले जनाएको छ।

विद्यालय व्यवस्थापन पक्षले यस्ता धार्मिक तथा सांस्कृतिक कार्यक्रमहरूले बालबालिकामा नैतिक मूल्य, संस्कार, अनुशासन र शिक्षाप्रतिको सम्मान विकास गर्न महत्वपूर्ण भूमिका खेल्ने विश्वास व्यक्त गरेको छ। साथै, यस्ता कार्यक्रममार्फत विद्यालय र अभिभावकबीचको सम्बन्ध अझ मजबुत हुने पनि बताइएको छ।

युरो किड्स, गोठाटार प्रारम्भिक बालशिक्षामा गुणस्तरीय, सुरक्षित र बालमैत्री वातावरण प्रदान गर्दै आएको एक प्रतिष्ठित शैक्षिक संस्था हो। खेल, सिर्जनात्मक गतिविधि, संस्कार र आधुनिक शिक्षण विधिलाई समान रूपमा महत्व दिने यस विद्यालयले नानीहरूको शारीरिक, मानसिक र बौद्धिक विकासमा विशेष ध्यान दिँदै आएको छ। गोठाटार क्षेत्रका अभिभावकहरूको विश्वास जित्दै आएको युरो किड्स, गोठाटारले आगामी दिनहरूमा पनि बालबालिकाको उज्ज्वल भविष्य निर्माणमा निरन्तर योगदान पुर्‍याउने प्रतिबद्धता जनाएको छ।